• Finoana sy Dera
• Contact
• Tsiahy an-tsary
• Blog
• Liens

14 FEBROARY 2010:VATSIM-PANAHY:MAMELONA ANTSIKA ANDRIAMANITRA

ALAHADY  14 FEBROARY 2010

VATSIM-PANAHY

EFESIANA  2 .1-10

MAMELONA ANTSIKA ANDRIAMANITRA

Misy fomba fiaina izay mitondra ny fahafatesan’ny olona ara-panahy, dia ny fifikirany sy ny fanarahany an-jambany  ny fiheveran’ny tenany manokana ary tsy mitodika amin’Andriamanitra ka entiny manohitra ny Sitrapon’Andriamanitra izany.

Raha nanoratra ho an’ny Efesiana Paoly dia te- haneho fa ny famonjena sy ny fampihavanana ary ny fampiraisana ny olona ao amin’i Jesoa Kristy no fototry ny Asan’Andriamanitra.

 Andriamanitra te hanome fiainana hatrany ny olona ka:

1-NANALA ANTSIKA AVY AMIN’NY FAHAFATESANA  HO AMIN’NY FIAINANA.

Ny fiheveran-tenan’ny olona sy ny samy maka ho azy ka nanoherany ny Sitrapon’Andriamanitra sy ny nandavany an’i Kristy no antony nandrava ny fiombonana sy ny firaisana amin’Andriamanitra.

Ny fankatoavana ny fanangolen’i satana no nitondra ny  fiheveran-tena ho zavatra , ny fahadisoan-kevitra lehibe ka nitondra ny olona ho amin’ny fanaon’izao tontolo izao (tsy manaiky an’i Kristy fa mandeha araka ny filàn’ny nofo  ranofotsiny ary ny mihevitra ny mandrakizay.) Io fahadisoana io sy ny fahotany no nitondra ny olona ho amin’ny fahafatesana, ary tsy ny fahafatesan’ny nofo ihany fa ny fahafatesan’ny fanahy indrindra koa.

Tonga tafasaraka tamin’Andriamanitra ny olona, kanefa avy amin’izany no mbola nanakekezan’ Andriamanitra azy hiala amin’io fahadisoana io ka nanomezany an’i Jesoa Kristy. Ho velona amin’ny finoana sy hanao ny Sitrapony.

Toa Andriamanitra minia mikimpy mihitsy mba hamonjena sy hamelomana ny olona indray avy amin’ny fahafatesana ho amin’ny fiainana. Izany no fahasoavana,  famindrampo ary mbola antso vaovao hatrany atao ho an’ny maro.

2-AVY AMIN’ANDRIAMANITRA NY FIAINANA KA MANANGANA ANTSIKA HIARA-MIAINA  AMIN’I KRISTY.

Mahagaga ry havana, ity fitiavan’Andriamanitra ity, fa na dia efa mihosina amin’ny fahotana lalina aza ny olona dia mbola tsy foiny fa nanehoany ny fitiavany. Io fitiavana io no nahatongavany hamelona indray ny olona tamin’ny fidirany niara-nonina tamintsika tao amin’i Jesoa Kristy.

Izy Jesoa Kristy no fihavanantsika izay naha-iray antsika roa tonta ka nandrava ny efitry ny fisarahana  tamin’Andriamanitra.

Avy amin’Izy Andriamanitra ny zavatra rehetra hahazoam-piainana. Izy no manafaka ny olona amin’ny toetra sy fanao tsy  mitera-bokatsoa. Izy no manala ny olona avy amin’ny fahafatesana ho amin’ny fiainana, ary ao amin’i Kristy sy ny fiainana miaraka Aminy izany fahavelomana vaovao izany.

Mitondra fiovam-piaina vaovao ny velona ao amin’i Kristy  ary ao Aminy no hitohizan’ny famonjena sy ny fiainana.

Tamin’ny fitsanganan’i Jesoa Kristy tamin’ny maty no isantaran’izay mino rehetra koa ny fananganana amin’ny maty sy handraisany ny fiainana. Natsangany sy novelominy hiara-miombona fiainana sy ho mpiray lova amin’i Kristy ao amin’ny fanjakana mandrakizay izay nomanina ho an’ny mino rehetra .

Raha mino  isika, dia ho tanteraka tokoa izany.

Dernière mise à jour de cette page le 14/02/2010